黃偉文一連10日「催交貨」 張敬軒《隱形遊樂場》MV今日上架

張敬軒上月在英國舉行演唱會期間，獲填詞人黃偉文（Wyman）漏夜送上新歌《隱形遊樂場》的歌詞，軒仔更請Johnny Yim趕工編曲，在尾場演唱會首唱新歌，並於當地拍攝MV。新歌面世逾月，Wyman上星期開始在社交平台每日出Post催促軒仔派歌，終於新歌的MV在周四（20日）正式面世。

《隱形遊樂場》一曲在倫敦錄音和拍攝MV，軒仔表示MV取景倫敦，既是意外，亦是最好的安排：「原本完咗演唱會後，打算同爸爸媽媽去法國旅行放假，但爸爸媽媽身體唔舒服，突然間我又塞咗喺倫敦，喺倫敦又有阿Y好多朋友喺度，又有好多香港嘅朋嚟咗呢度。」

軒仔本身的團隊亦因為改不到機票，最後只剩下軒仔及攝影師二人留在倫敦籌備MV工作，軒仔索性落場玩每一個「攤位遊戲」，自己做Art team，又找了老朋友Queenie Yu擔任Art director和Styling，上至監製、聯絡當地拍攝團隊、演員、搵景、美指等，下至木工道具、為眾人訂午餐，軒仔都一手一腳負責。

由3月16日把旋律發給Wyman，到3月26日拍攝MV，十天內經歷把歌錄起、跟MV中的演員casting、尋找拍攝團隊、找道具、搵景睇景，軒仔坦言每一次開會的對話都是「唔得㗎、唔得㗎」，「但當大家傾完之後就『會得㗎、會得㗎！』不斷話俾大家聽，係會得嘅！」深深體會到香港人永遠都能將不可能變成可能獨有的精神。

軒仔表示最神奇的是MV中的旋轉木馬︰「我哋第一個選擇係London Eye隔籬河邊好多人都好鍾意去嘅旋轉木馬，但原來要提前一個月申請，所以冇辦法喺嗰度拍攝。點知後來突然接到嗰位老闆嘅回覆，佢話如果我想嘅話，佢仲有一個喺佢親戚嘅backyard。我當時拗晒頭，之後site visit，嚟到呢個叫Chichesterr嘅地方，睇完就覺得呢件事一定要做。當地人好好，幫我哋book到煙花，仲有我哋隊crew，所有嘢有種水到渠成嘅感覺。呢10日每日瞓3、4個鐘，我啱啱從流感、水土不服當中好番，但係好多謝Wyman同我哋嘅團隊。」

MV的拍攝團隊及演員全是居英港人，軒仔表示MV中的情節都是他們的生活經歷︰「埋位嘅時候，呢隻歌一起，佢哋嘅情緒就嚟，所以大家睇MV嘅時候見到每一個場口都係真，我哋冇嘢係NG過、冇嘢要重新嚟過。每一滴眼淚、每一個笑容，都係喺呢度生活嘅人嘅寫照。」

Wyman透露填詞靈感源自於他今年二月到米蘭參與時裝周，一天在街上發現一塊廣告燈牌，並寫着「The future is an invisible playground.」，「未來就係一個你睇唔到嘅遊樂場。我覺得幾有意思，可以elaborate一個精神、或者成為一句歌詞，其實都未知，就袋咗先，呢啲咪就係靈感嚟搵你囉。」他又謂這件事對他來說有特別的意義，「九十年代，甚至過咗千禧嗰幾年，香港樂壇做廣東歌，其實係喺一個好快嘅節奏裏面做。呢個節奏近十幾年已經冇咗所謂嘅『七日鮮』，『七日鮮』唔係眨義詞，其實係一種好香港精神嘅嘢，我好多年都冇試過，今次好似突然之間回復番十幾二十年前嗰種熱血，真係好老土又講番嗰幾個字，香港精神、我久違咗嘅一個香港精神。」
@