男子組草蜢日前於美國三藩市舉行一連兩場「草蜢RE：GRASSHOPPER演唱會2024三藩市站」，然而蔡一傑因身體不適而未有參與今次演出，台上只餘蔡一智與蘇志威，不過一樣無礙他們的精彩演出，笑言出盡200%力，兩晚都High爆全場。

阿智說：「雖然我哋三缺一，不過美國嘅朋友一樣咁支持我哋。相信傑仔知道咗一定舒服晒，等佢休養完，下次再返嚟美國同大家見面，到時一定會玩得更開心。」

雖然三缺一，但阿智與蘇老闆繼續以以多首快歌揭開序幕，《好戲在後頭》、《華麗舞台》、《三分鐘放縱》、《紅唇的吻》、《今晚停了電》、《失戀》和《ABC》。全場觀眾拍手尖叫，在台下跟着音樂又唱又跳，氣氛高漲。

完騷後阿智與蘇老闆接受訪問，兩子表示，由於今次演出三缺一，部份歌要重新編排、重新走位，所以一下機就在酒店備戰，爭取時間綵排，未有外出遊覽。蘇老闆說：「到咗酒店就困自己喺房唔出去，養精蓄銳。始終三缺一，走位同埋啲歌要重新編排，一落機就喺酒店備戰，冇出過去，唯有落去跑步同健身。」阿智笑說：「去咗酒店房、酒店房廁所，我間房望出去風景好靚。」

幸而在出盡200%力的他們亦得到觀眾的熱情鼓勵，二人都表示「感覺好正呀！」。阿智說：「原本我哋Jet Lag暈下暈下，但聽到佢哋啲掌聲同歡呼聲，即刻成個人精神晒，4倍能量返番嚟。好多謝大家支持我哋，就算少咗一位成員，佢哋嘅掌聲冇少到，將傑仔嗰份平均分畀我哋兩個。」他繼續大讚說：「第二場嘅氣氛更加Hot，好瘋狂。第一晚嘅觀眾斯文啲，冇玩到人浪，今日終於秉承到我哋玩人浪嘅文化，人浪聲仲要好大聲。」蘇老闆聲沙沙笑說：「你聽我把聲就知我出盡力，完全冇留力！」

阿智透露第二場的歌單加插了小驚喜，就是首唱梅艷芳的《冰山大火》。他說：「向我師傅梅艷芳致敬，知道好多美國朋友都好掛住佢，除咗《緋聞中的女人》，我哋仲揀咗呢隻，希望美國朋友永遠都記住阿梅啲經典歌。如果唔係場館有時間限制，我哋會係咁唱落去。」蘇老闆說：「唔緊要，我哋出年40周年喺香港見。三藩市嘅朋友，你哋應承咗過嚟探我哋！」@

------------------

🏵️《九評》20周年👉🏻 https://hk.epochtimes.com/category/專題/退黨大潮

💎成為會員 📧訂閱電子報
https://hk.epochtimes.com/subscribe

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand