歌手梁釗峰新歌《離合的藝術》MV昨日（18日）上架，釗峰為今次MV邀請了自己的80歲大姑媽、還有自己的髮型師好友Zanki、同學、造型師和排舞師等好友演出，他笑言自己今次「碌爆人情咭」，欠了一班親戚好友的一世人情債。
釗峰表示，新歌《離合的藝術》講述世間的愛情、以及每一段關係的悲歡離合、有聚有散，又大讚填詞小克能讓他優雅地面對離合。釗峰又透露自己與作曲的永夏、填詞的小克、監製的陳考威和MV導演都是相識多年的朋友，但今次卻是第一次在工作上合作。
《離合的藝術》MV邀請到話劇界神級演員區嘉雯和高翰文演出，讓釗峰亦變成了「小影迷」，沉醉在前輩的演技中：「重中之重當然係翰文大哥與嘉雯姐嘅戲份可謂『劇力萬鈞』，佢哋飾演一對好耐無見嘅舊情人，心照不宣，雖然無對白，只用眼神，好適合呢首歌。」
釗峰在MV中有一段獨舞，拍攝前兩天他預先在排舞室苦練，到場後默默在一旁練習，非常認真。他笑說：「多謝老師悉心教導，我覺得自己十幾分鐘就上手。但跳到又唔代表跳得好睇，學識之後再用畢生嘅時間去跳好，我未跳得好。」從這次單人華爾滋，釗峰有所領悟：「男人最緊要有膊頭，被搭住就要支撐住對方。單人跳舞要靠幻想，練習時我幻想跳舞老師，諗住佢會點樣督促我。至於拍MV時，我梗係幻想過去離離合合嘅對象。希望睇到MV嘅人，聯想到自己同最難忘嘅人，跳返一場舞。」
提到有份參與演出的大姑媽，釗峰興奮表示：「早前同大姑媽慶祝80歲生日，佢嚟拍MV好開心，話個個都叫佢大姑媽，個個都係佢侄仔侄女。」為配合MV劇情，釗峰出動私伙咪高峰和耳機，現場唱這新歌給嘉賓聽。他說：「今次邀請相熟朋友拍攝，佢哋代表唔同年齡層，我希望坐喺對面聽我唱歌嘅係熟人，同我有connection，我可以唔忌諱，好放鬆咁去唱歌，令MV更有靈魂。」@
------------------
🗞️9.17暫別實體 立即預購
https://bit.ly/buybyepaper
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
