位於大嶼山大澳坑尾村獅山麓的龍巖寺，創建於1929年，1980年於寺院主樓西南面興建了一座兩層高的骨灰安置所，約有1,600個龕位，九成以上都是安放大澳的先人，為非牟利龕場。

在私營骨灰安置所條例於2017年6月30日生效，規定私營骨灰龕場必須領有牌照才可售賣或出租龕位。龍巖寺亦有申請牌照，但前年9月21日，私營骨灰安置所發牌委員會指龍巖寺申請牌照時，未能符合條例所要求而拒絕其牌照申請，上訴亦被駁回，龍巖寺需要停止營運及進行清灰程序，即近千個大澳人的骨灰要在今年的4月1日起的一年內，被「逼遷」到香港各區。

冼女士的父母及祖先的骨灰均安放在此已數十年，先人都是原居民，「大澳都係小島嚟之嘛，搞嚟搞去，希望可以留返個位。」她對政府的做法表示反對，「人哋霸地你又唔管，呢啲小兒科你就管。」現時惟有等待政府安置。

原居民張先生更是一腔怒火，「我哋啲原居民（喺度）咁耐，喺山度搬落嚟，而家你又叫我哋搬返上山，成廿幾個點搬呀？」戲言說會「搬返屋企」。他對政府的做法大感無奈，「都冇辦法傢，佢係唔畀牌你，要你搬遷咁點呢？」

截至2018年3月29日完結時，私營骨灰安置所發牌委員會收到共144間私營骨灰安置所提交的指明文書申請，但至今只有7間獲批牌照，張先生提到此事，指如果真的要「整頓」，則要平等處理，「你淨係搞大澳，定係搞埋（其它無牌）嗰啲先？唔好整啲唔整啲，如果政府官員做唔到，就叫佢辭職！」

大澳龍巖寺骨灰龕關注小組今日（28日）招開記者會，發起人黃惠琼指，發展局於2010年12月16日公布首份私營骨灰安置所表列名單中，龍巖寺被列入表一，亦即基本上符合規劃及地契條款的要求。而龍巖寺的承辦人都是幾位長者，「佢哋咪覺得出埋報紙囉，我哋係合乎資格嘅龕場，唔會覺得你唔會畀牌我」，就算其後再補交文件及資料也不獲接納。

由於他們不懂亦不理解申請牌照的繁複程序，以致未能滿足發牌條例的要求。「政府一方面話好難搵地整骨灰龕，咁呢度有1,600個，咁你咪畀時間佢完善囉，好過我哋仲要同全香港啲人（爭）抽籤」。她又指當局沒有體諒居民的需要，亦沒有了解大澳的獨特性，「你睇吓龍巖寺骨灰龕同周圍幾咁和諧」。

黃惠琼又提到，政府一方面投放超過十億打造「活化大澳」工程，搞廣場、興海堤、建電動開合雙橋等等，全部只配合旅遊的發展，但當維繫著大澳人的人民文化、歷史鄉情受到衝擊時，各部門卻互相推搪。

現時已與各街坊有共識，表明集體不會「清灰」，會繼續爭取保留龍巖寺骨灰龕場，下一步會以小組名義去信立法會，向政府有關部門申訴，希望能「原區安置」先人的骨灰，大澳的先人可以繼續在家鄉安息，並可延續子孫後代的大澳家鄉情。@

------------------
🎥【動紀元】每日有片你睇：
https://bit.ly/3PJu3tg

☑️ 登記會員享專屬服務：
https://hk.epochtimes.com/subscribe
☑️ 贊助大紀元：
https://www.epochtimeshk.org/sponsors
☑️ 成為我們的Patron：
https://www.patreon.com/epochtimeshk

------------------

🏵️《九評》20周年
https://hk.epochtimes.com/category/專題/退黨大潮

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand