食完沙利文後持續大雨，雖然去唔到澳門嘅景點遊覽，但依然影響唔到我繼續享受美食嘅心情，一轉細雨我同朋友立即坐車向官也街出發。
官也街相信大家都好熟悉，因為喺氹仔碼頭附近，好多人買完手信就由氹仔碼頭搭船走非常方便。我同朋友大概夜晚7點去到官也街，因為落雨唔係好多人，先行去安德魯想買個葡撻食吓，點知貼出告示話賣晒。食唔到葡撻就周圍行睇吓仲有咩好食，行行吓就到咗譚家魚翅門囗。平日經常都大排長龍嘅譚家魚翅，因為落雨竟然只得幾個人排隊，咁少人排隊我梗係唔執輸啦！我前面係幾個韓國人，應該都係慕名而嚟嘅，譚家魚翅出名又平又好食，最重要係足料，所以生意好到做唔切。
入到去我坐近門口位置，側面剛好係開放式廚房，隔著玻璃可以清楚見到佢哋嘅製作過程。佢哋將一個個石鍋先用火燒燙，然後加魚翅同配料，最後加個濃郁芡汁，完成後立刻拎出嚟上枱。我見佢整嘅花膠魚翅有好濃嘅芡汁，望落好重膠質，睇見都知肯定美味！
我同朋友點咗一個花膠海參中勾翅，加一個菜膽雞燉翅，兩個都係平價嘅魚翅，花膠海參中勾翅係石鍋上嘅，上枱嘅時候重係滾到起泡，香味四溢。魚翅一梳足有2.5両，湯底好濃，好有膠質，係魚翅羹嘅口感，花膠同海參雖然只係一般貨色，但係一鍋只係68蚊又足料仲想點？！
再嚟係菜膽雞燉翅，呢個就係雞湯嘅口感，裏面又係有2.5両嘅魚翅，仲有娃娃菜同雞肉。魚翅爽口，湯就清甜唔油膩，一盅同樣係只需68蚊。兩個人食到好滿足埋單，都只130幾蚊，真係平到笑，難怪日日排長龍做到冇停手。
佢哋除咗魚翅仲有鮑魚同燕窩添！真係鮑參翅肚都有齊，價錢一樣係豐儉由人，一班朋友去食真係唔錯㗎！◇
譚家魚翅
地址：澳門氹仔舊城區告利雅施利華街30號地下
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
