今次澳門行，臨走都不忘同朋友去榮暉咖啡美食，食返個馳名雞湯米，同天麻川芎魚頭米。
十月初五街有好多又平又好食嘅地道小店同食肆，記得第一次發現呢間好食又地道嘅茶餐廳應該係10年前，當時澳門仲未係好多遊客，亦未有米芝蓮品評嘅食店。其實我個人唔鍾意睇旅遊書介紹餐廳食店，我鍾意自己穿街過巷慢慢發掘地道好嘢食。
當年無意間走入榮暉，發現成間茶餐廳幾乎爆場，而且都係澳門本地人我就知道冇入錯了。坐底就點咗碗馳名雞湯米嚟試，唔食由自可，一食不得了！當年只係20蚊一碗嘅雞湯米，藥膳雞湯飲落去濃郁香甜可口，雞肉嫩而不嚡，充滿雞肉鮮味。而且非常大碗足料，碗裏嘅冬瓜吸盡湯汁精華，超好味，真係一試難忘。佢哋嘅芝士雞扒包都香脆可口、皮脆肉嫩㗎！
記得我後來帶媽咪去食，我媽咪一向係百彈齋主，因為佢識食識煮，所以好少讚街外嘅食物，但係佢去呢度食過雞湯米都讚不絕口，話今時今日竟然食雞可以有好香雞味，可見真係真材實料。
今次帶朋友去我依舊食雞湯米，朋友就食天麻川芎魚頭米，朋友一試就愛上。用魚頭同多種藥材熬嘅湯，飲落香甜舒服，唔會滿口藥材味，魚肉鮮甜，聽講好多賭場荷官都會去食呢個魚頭米嚟補身添！大大碗落足料都係42蚊咋！朋友話下次去澳門一定要再食。
雞湯米我由當年嘅20蚊食到今時今日嘅35蚊一碗，雖然35蚊，我都覺得物有所值，因為真係好好食。
臨走老闆娘見到我哋拍嘢仲主動同我哋打招呼傾計，非常友善，仲話我哋下次去嘅時候同佢講聲，再整靚啲畀我哋食。我哋笑住話其實已經好靚，下次一定再來，到時介紹我哋試新嘢，佢話一定！哈！我又多個再去嘅理由了！◇
榮暉咖啡美食
地扯：澳門十月初五街54號地下
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
