草蜢上周六（17日）在佛山國際體育文化演藝中心舉行「RE:GRASSHOPPER 草蜢演唱會2024佛山站」，全場爆滿。草蜢台上勁歌熱舞，觀眾就在台下跟住又唱又跳、玩人浪和大合唱，兩度encore，草蜢盡情演唱。即將踏入出道40周年的草蜢下月將會轉飛美國巡唱，並將會推出新碟和舉行40周年演唱會。

演唱會準時開騷，音樂響起，全場觀眾都興奮尖叫，亮起手上燈棒，草蜢出場一口氣跳唱《好戲在後頭》、《華麗舞台》、《三分鐘放蹤》、《紅唇的吻》、《今晚停了電》、《失戀》和《ABC》，全場氣氛高漲。

草蜢滿頭大汗，蔡一智說：「終於嚟到佛山開騷，多謝你哋一聽到草蜢要嚟開演唱會就即刻搶飛，真係抵錫。」傑少揚言將草蜢三個人的心都送給歌迷，蘇志威表示歌迷熱情反應令他熱到滿頭大汗。

然後一如草蜢演唱會「傳統」，他們一邊唱《黃昏都市人》和《舊唱片》，一邊與全場觀眾玩人浪，非常開心。今次演唱會首次加入《夜了》到歌單，全場大合唱。草蜢在台上向觀眾公布好消息，蔡一傑表示：「仲有幾個月，草蜢踏入40周年，希望申請到喺香港開演唱會，到時你哋會唔會嚟捧場？」全場觀眾大叫「會」。

完騷後草蜢接受訪問，蔡一傑興奮地說：「感覺好正，當第一場騷咁做，唱得好爽，好投入，好盡興。」蘇志威說：「今日觀眾嘅反應為我哋打咗支強心針，其他場數更有信心，好抵讚，七點零五分坐齊人，準時開騷就可以唱多啲歌。」蔡一智就表示：「今次特別為咗佛山站唱《夜了》，之前巡唱咁多場都未唱過，嘩，頭先我見到台下觀眾同我哋大合唱。今日觀眾嘅燈海好靚，好似香港睇黃昏日落景色，一片金黃色好靚，我唱《Framily》嘅時候睇到好warm，好感動！」

他們又透露下月中將巡唱到美國，同時忙於籌備新碟和草蜢40周年演唱會，敬請歌迷期待三子為大家準備的一連串驚喜。@

------------------

🏵️《九評》20周年👉🏻 https://hk.epochtimes.com/category/專題/退黨大潮

💎成為會員 📧訂閱電子報
https://hk.epochtimes.com/subscribe

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand