四場個唱完美落幕 安仔想食肥牛飲凍檸茶

唱作人陳健安（安仔）一連四場《Live afteR Life 陳健安2024演唱會》，前晚（3日）在旺角麥花臣場館圓滿結束，安仔媽咪坐正第一行睇足全場，又喊又笑。演唱會圓滿成功，戒口個多月的安仔表示最想食火鍋和飲凍檸茶。

最後一場個唱有C AllStar好兄弟梁釗峰、樂隊Nowhere Boys的Van、女團Me&的Vian、同門師弟蔡浩然（Scott）和洪端珙（阿珙）、好友麻利、鍾雪瑩、造星V囝囝Tsoul、希晉、Hei、貓仔和樂庭，以及女團LollyTalk等捧場。

安仔媽咪亦再度現身捧場撐安仔：「媽媽嚟咗睇兩場，開場第二首歌《愛的一種練習》，每次唱都會搵吓媽媽。之前我開新碟發布會專登唔唱呢首歌，留返有full band咁唱畀佢聽。第一場完騷後，佢同我講佢喊，我話我喺台上睇到。」又爆料媽媽每次捧場，例如頒獎禮，佢就會化妝扮靚，隆重其事，「今日專登化粧Set頭，佢平時無化妝架，代表佢好支持我。

安仔媽咪亦再度現身捧場撐安仔，安仔表示唱《愛的一種練習》時，總會望落台搵吓媽媽。（寰亞提供照片）

完場觀眾不散場大叫encore，安仔再度上台連唱3首歌，包括慢版《唔明你講乜》、《煉獄健身室》和鋼琴版《仍然是那個少年》，然後突然除去身上演唱會Tee恤拋去台側觀眾席，全場尖叫起哄。最後他說：「我好開心、我好滿足，我嘅第一個演唱會有你哋一齊見證，期待大家嘅千字文，我會好好品嘗，希望大家好好回味呢個演唱會，多謝大家！」然後衷心鞠躬致謝，全場掌聲歡呼，演唱會完美落幕。

完騷後安仔表示好開心：「好感動，好難得完成四場演唱會，第一次一個人唱晒4場，之前真係有啲擔心，今日我好滿足！」

演唱會和音「雷同二友」成員兼表演嘉賓謝芊彤則投訴在台上被安仔整喊，說：「我哋每晚都畀你搞喊，其實綵排已經喊，當時我心諗希望你唔好再唱。」另一位和音成員，「雷同二友」的謝芊蕾自爆，演唱會由第一首歌就開始想喊，她說：「其實安仔一講嘢，就連開場前後台嗌Good Show我就已經喊啦！」安仔說：「第一場叫Good Show時我講咗一句：你哋好重要！佢哋就叫我『唔好講呢啲嘢啦』，我即刻轉語氣。」安仔坦言台上盡量避免眼神接觸，以防眼淚決堤。

演唱會圓滿成功，安仔最想食火鍋和飲凍檸茶，他說：「我為咗演唱會食清淡啲，不經不覺戒口個多月，主要食粥，整個月無飲凍飲，依家好想飲凍檸茶、食肥牛、炸响鈴，仲要有咸蛋黃嗰款，唔邪惡唔食。」@