3月30號睇咗「一人婚禮」，顧名思義係一個人喺狂潮之中嘅自我表達，其中有小丑情淚，有網紅弄虛作假，現實中嘅虛幻世界，如真似假，似假還真。導演周冠威喺「時代革命」之前構思嘅電影劇本，又係「時代革命」之後可以上映嘅電影；原有資助嘅人大部份退出，重新資助嘅人有40個50個60個，每人都係少少支持。演員應承咗但係退出嘅，有啲簽咗衰仔紙，有啲公司唔批准演出，但女主角吳冰第一次獨挑大樑，未悔承諾；喺黃曆新年上映一套文藝喜劇，叫好唔叫座，但係最重要嘅，今日喺英國現場見到周冠威：你好嗎？
電影播放之後嘅分享會，周冠威感謝所有出席嘅觀眾，喺香港出席大大小小嘅公開、私影會九十幾場答客問，其中嘅演員王宗堯更大部份時間出席，王宗堯被控於2019年7月1日暴動以及進入或逗留在立法會會議廳範圍罪，案件將於2023年5月開審。
3月31號第二屆香港電影節閉幕，「野草不盡」係留美導演黃靖凝拍攝嘅，記錄幾名青壯年香港男女移居前後嘅心路歷程，都係倉皇西顧，萬般不願捨不得，有啲係暫時觀望；海外天涯，何處無芳草，野火燒不盡，春風吹又生。硬頸年輕人堅持一個香港人嘅身份，到處都自詡Hongkonger，自傲自矜自豪同埋失落。其實最難得嘅就係呢個閉幕電影之後三位導演嘅分享會，又見周冠威，加林森同埋黃靖凝。
林森係「窄路微塵」嘅導演，關注逆境中掙扎求存嘅基層命運，呈現微塵嘅善良同埋生命力；林森自己話喺風急浪高時都有所求有所不為；但係為咗兩個小朋友佢選擇留在英國，差不多一年了。年輕黃靖凝2017年隨家人移居美國紐約，2019年返回香港拍攝時代紀錄片，相對嚟講佢嘅心態或者空間較多較寬，佢喺海外尋求資金，海外放映和參展。掙扎最大嘅當然係周冠威啦，佢拍咗「時代革命」之後已經冇乜嘢片唔可以拍，而家係最自由嘅創作空間。每個人都有自己嘅侷限，心中嘅一條紅線，表達要講嘅嘢拍你自己想做嘅。香港政府有冇紅線？俾你估唔到。喺英國殖民地90年代初期：電檢改為分級制，連政治審查個一條都已經剔除左，咁而家又倒退番20幾年，悲嘆無極限。藏有羊村繪本連環圖違法，網上分享民主抗爭訊息被捕，滅聲行動經已開始；恐懼就是滅聲。
電影反映時代，為時代發聲，電影人堅持創作，海內外觀眾要互相扶持，海外參展，海外放映，唔同形式嘅放映同埋交流，絕對重要：海外存知己，天涯若比鄰。
現場一位台灣觀眾問台海局勢風雲變幻，會否影響兩地電影合作計劃？又會否不再參與台灣金馬影展等活動？近幾年香港電影參展台灣金馬獎或者海外嘅影展、電影節非常頻繁，呢一、二年香港嘅本土電影票房係破紀錄；對本地製作電影嘅支持熱度狂飆。電影作為大眾媒體深入民心，一種情緒一種脈搏其實係非常之重要，站一個好尖端嘅位置。所以香港好多獨立嘅電影製作人係唔會灰心，唔同主題、唔同層次、唔同角度，發揮電影創作嘅才能、才情、才華，而香港觀眾的眼睛是雪亮的。當朦朧的中華民國國旗，或者半句台獨標語，或者沒有甚麼理由的理由，都會成為禁片，這絕對是個荒謬的年代。
又一位現場觀眾香港音樂製作人話，早前喺香港曾經有個音樂活動舉行，食環署要主辦者回答一連串嘅問題：第一題問如何保證演出嘅音樂製作人同埋藝人唔會違反國安法；第二題係如何保證現場觀眾唔會違反國安法；第三題係假如上述情況發生咗，主辦單位如何制止同埋舉報。不知怎樣回答還是答了，音樂會也如期舉行。在座幾位導演都覺得呢一條紅線係無形炸藥係可以隨時轉龍門，你都唔知個底線喺邊度，所以只能夠係用平常心去應對。今日要努力地做，明天的事不能預知。每一場嘅聚會都可以係最後一場。今天離開香港，明天𣎴知道不可以回去；回家去了不知道可以不可以再出來。每一餐歡聚飯都算是最後一餐。
困乏我多情，絕處求生喚發更深涼嘅創作動力，時代嘅召喚，透過唔同嘅電影唔同嘅人唔同嘅手法，保存一個生存嘅印記和我城嘅生機。
英國第二屆香港電影節放映城市更多場次更多，有賴伍嘉良、黃靜兩位和團隊台前幕後下了死功夫，難得難得。
這個世代，香港不要更多嘅殉道者。◇
------------------
🗞️9.17暫別實體 立即預購
https://bit.ly/buybyepaper
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
