肖老闆落台，劉老闆上場，出乎意料係三會（銀監，保監同證監）一把手都係農行出身，亦先後表過態需要加強監管金融創新同嚴查違規行為，係唔係為左以加強監管為名，實為合併三會做準備就不得而知；之前農行39億票據變報紙單案，剛好係劉老闆在位時候發生，日後爆大鑊會唔會有影響就無人知（或者三會合併後劉老闆就功成身退）。重有單新聞幾奇怪，工行西班牙分行俾人話洗錢，帶走左5個管理層助查，傳聞牽涉最少4,000萬歐元，重話有可能高達2億歐元；表面睇無乜特別，諗真D就發覺唔對路，擺明走私漏稅，錢出左大陸重翻轉頭，搏出左事易充公咩？（當年賴老闆都識得將錢放外面，唔通真係最危險地方就係最安全？），最關鍵就係五個高管夾埋賺呢個錢，咁難得派出國，日後大把世界，數目咁細點會搏，內裏原因耐人尋味。而家大陸一線樓價都到左要中產20年唔食唔洗先夠買的地步，試問重有幾多空間可以升返去2014年，場外高槓桿配資做成舊年股災；今年股票配資無得做，資管公司就借俾人買樓（次按出現），難聽D講就係你肯簽名認頭，一分錢首期唔使你出都得，乖乖供樓就好；無條件買樓D人都買埋樓，高位幫手接貨，銀行狂放按揭，加上十幾年來錯誤貨幣政策，做成房價有升無跌，而家可以有辦法買樓重唔搶著去買，可憐老百姓最後一注本錢都榨乾淨，樓價一跌就救命錢都無埋。萬科北京樓盤話加價，原因係附近有地王出現（咁似美人魚開場個段）。阿爺為左救屋仔出盡辦法，降首期，契稅營業稅優惠，就差在未減息，真係乜招都出埋，如果咁都去唔到庫存就大件事；問題係一線城市點都有人買（業內人士估計去庫存大約7年），好似上海最近就出現352間上千萬新盤一日賣完；三四線就無人要（估計去庫存周期大約25年），庫存又點去到呢？
上個禮拜三收市後突然成街都係恒指19,400到19,500打靶D啤啤熊，話口未完就開始挾淡倉，象徵式穿一穿19,500就回，重要高位開左大手國指7,000點附近期權淡倉，恆指期權18,200附近淡倉；啤啤熊高位無再俾莊家掉出街，加上之前18,300附近D牛牛又未殺，應該呢轉會落去搞掂埋，後市有無得升就唔知，不過恆指今年埋單應該19,000附近（遠期期權重倉位）。香港進入業績期，衰的多好的少，有驚無喜，向下炒應該易D。歐美暫時無大事發生，大跌後亦都反彈翻好多，應該都係波幅為主。
呢期輪到隻新聞主角必瘦站1830，集團主要在國內，香港同澳門提供纖體美容服務，主打國內市場中高檔客路（參考分店數目同會員數目），一般美容療程（不包括醫學美容）套餐在一萬左右（30次療程折扣後價錢），如果需要用特別儀器每次療程收費介乎1,000至3,000人民幣。國內經濟下滑已經係事實，中產客戶消費力有幾多影響重未浮現（國內一線奢侈品店數目都少左好多，品牌美容連鎖店去年更加好景不常）；最負面可能就係最近雪花秀事件，雖然調查結果未出，如果話管理層完全不知情，好似又講唔通。如果大家網上刮刮料，可以睇到一大堆國內分店不良銷售手法報道，商譽比較負面。剛剛中期業績營業額增長40%，稅前盈利輕微下跌，估計係國內經營成本不斷上升同8.11人仔匯率開始走軟有關，稅後盈利受惠稅務支出減少先微升；近幾年中期派息率100%，加上Value Partners去年分別先後四次減持（睇長線都減倉），相信老闆短期內都無心大搞。房價飆升帶動租金上漲，經營成本的增加預期在今年會體現出來；過份倚賴國內市場加上人仔貶值預期；睇圖重要級級落，低處未算低，市盈率雖然只有7倍，仍然不值得買，真係要買就等0.6先考慮，唔好貪息高就贏粒糖輸間廠。
下星期講隻鱷魚恤122。
讀者有任何交流的，可以發電郵至 fundsniper@yeah.net，大家多作交流。（以上觀點僅為個人對市場的看法，並非任何投資勸誘或建議。）◇
------------------
🏵️《九評》20周年
https://hk.epochtimes.com/category/專題/退黨大潮
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
