剛剛話完怕阿爺外匯儲備越來越少，呢邊就話離岸結算都要俾存款準備金，唔通真係開始水緊？用俗D講，人地開個窗口幫你做結算抽D水，賺雞碎咁多，而家話要收準備金，人地做生意識計數，拖低左資金回報率重吸唔吸引就係問題；如果長期收存款準備金，人仔結算業務會唔會好快做大。唔好唔記得入SDR其中一個條件係自由兌換同使用，而家分明就係操控匯市，萬一因為咁入唔到籃就真係一殼眼淚（老美話在合乎條件情況下支持，到時候大條道理縮沙）。舊年成年個數唔靚，市場好似無反應兼開始反彈，其實大家預左唔靚，大家唔太差都收貨，放心搏一搏，所以有反彈好正常。小英順利勝出台灣選舉，好多人都話會唔會又搞台獨，如果翻佢個底，台獨就唔多似，親美可能性就最大，恐怕兩岸立場會有另類磨擦。老美個市好似好唔掂，其實高位回調好正常，市場大把專家吹風，又話股災要大跌，又話今年分分鐘加唔到息要倒轉頭減息；調轉頭諗，熱錢嫌貴唔買美股（宣佈加息後美匯強但美股唔強），反正都要回調，跌深少少搵人接貨會唔會好D，其實跌幾多唔係關鍵，跌完起唔起到身先至緊要。香港就無辜辜變戰場，阿爺就揀香港開火（最大人仔離岸結算中心），抽拆息收銀根去增加炒家成本，表面贏得漂亮，但就搵左香港股市陪葬；問題出現，炒家只睇有無錢賺，成本高唔代表唔去做，況且重有沽空港股補飛，阿爺重頂唔頂到下一波真係唔知。期權好倉無走，應該會急彈，大家要留意。
呢個星期隻中國生物製藥1177，公司主要業務從藥品研發，生產到銷售，種類包括心腦血管藥，肝病藥，抗腫瘤藥同鎮靜劑。表面睇國內人多藥貴，而且每種藥都係要長期用，前途應該好好；但國內一直都推行醫療改革，藥費下調係大趨勢，所以唔好睇咁好。吸引我係因為近期一單新聞，就係公司用16%溢價入股中國信達1359接近5%股權，同時簽埋戰略合作協議。咦!藥廠投資金融收買佬，業務上擺明九唔搭八，個市唔好重要溢價入股，大股東好似無諗過小股東感受喎。聲明入面話就話重點開拓醫療保健同人壽保險範疇業務為主，話明金融收買佬，好料都唔會俾佢收到翻黎啦。公司非全資附屬公司剛剛將一隻肝炎新藥的開發權（除中國地區外）賣左俾Janssen（強生子公司），如果順利通過臨床再投產，未計專利期內按銷售額抽佣部份，預期最高可貢獻約19.5億港元利潤。既然人地都肯買，隻藥無理由無前途，咁點解自己唔做，一般不離三個理由：無錢（研發），無技術（臨床）同無信心（銷售）。而家問題係唔知邊樣（從表面數據睇唔出，但入股信達後碰到收購項目可能有資金壓力，需要供股之類動作），去年，藥監局在7月22日發佈的公告也是對藥業非常不利，行內稱為722慘案（有興趣可以在網上搜尋），加上派息率又低，未見到同信達產生任何協同效應和業務突破之前，現價有貨沽貨，理想買入價3.5附近，合理股價5.0。
下星期講隻康寧醫院2120
讀者有任何交流的，可以發電郵至 fundsniper@yeah.net，大家多作交流。（ 以上觀點僅為個人對市場的看法，並非任何投資勸誘或建議。◇
------------------
🏵️《九評》20周年
https://hk.epochtimes.com/category/專題/退黨大潮
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
