在四大樂壇頒獎禮上捧走兩金兩銀女新人獎項的歌手盧慧敏（Amy Lo）早前推出首張EP 《Unveilings》，並於中環Soho House舉行音樂會，多名藝人包括許恩怡（Natalie）、林熙彤（Hazel）、陳健安、梁釗峰等都來捧場。Amy坦言看見台下的親友和Fans，感覺像與音樂舉行了一場婚禮。

音樂會開始，Amy以《白牆》打頭陣，從樓下一步一步踏上樓梯，邊唱邊行到以不同燈飾布置的舞台，之後還演唱新碟內作品，以及兩首Cover歌曲。完騷後，Amy情緒仍然高漲：「心情好複雜，推出第一隻EP同埋第一場個人音樂會，呢個情感真係好濃郁，我仲消化緊。喺台上見到好多面孔，由我開始做Model，每日陪我跑10個試鏡嘅同事，亦有以前嘅朋友，好開心！」

Amy Lo早前推出首張EP 《Unveilings》，並舉行音樂會。（寰亞集團提供）
Amy Lo早前推出首張EP 《Unveilings》，並舉行音樂會。（寰亞集團提供）
Amy Lo早前推出首張EP 《Unveilings》，並舉行音樂會。（寰亞集團提供）
Amy Lo早前推出首張EP 《Unveilings》，並舉行音樂會。（寰亞集團提供）

她又說：「我家族唔算大，好多親戚都有嚟，媽咪喺哥斯達黎加嚟唔到，但好多熟朋友，同埋由細睇到我大嘅Auntie都嚟咗，好似婚禮，我搞咗第一個我同音樂嘅婚禮！」音樂會台下大叫「Te amo」，西班牙文「我愛你」，她說：「好神奇，我第一次台上講『Te amo 』係今年叱咤頒獎禮，佢哋今晚好似回應番我嘅說話。」坦言在台上回頭看到音樂監製Mike Orange時，眼淚幾乎失守：「望到佢嗰1秒好似跑馬燈咁，由第一次錄《粉月》，呢一年嘅經歷爆晒出嚟，然後我逼自己忍住，收番啲情緒先。」

Amy表示「唔夠喉」，她說：「綵排未感受到個力量，當真正上到台專心唱嘅時候，就好似有人打咗支好強嘅針，有源源不絕嘅力量，好想不停唱。」問她想在更大舞台開個人演唱會嗎？她瞪大眼睛笑言：「請放大我嘅眼神，哈哈！其實我好想，但我亦都好珍惜碎步嘅福氣，我覺得經歷係一步一步累積，想慢慢收集養份。我唔係幾適合一步登天，碎步可以體驗同埋經歷多啲，學到更多，用時間浸出嚟。」

不少歌迷前來支持。（寰亞集團提供）
不少歌迷前來支持。（寰亞集團提供）

首張EP《Unveilings》收錄了一系列以顏色為主題的歌曲，但封面卻以黑色和刻意拍得朦朧，Amy解釋：「每個人有好多面向，未必係一眼就望到，其實黑色入面可以有好多顏色，人可以有好多面向、心情、情緒、經歷。呢張唱片用黑色，亦都真係我最鍾意嘅顏色，去包住入面好多唔同嘅Amy。刻意選擇唔係好清楚地呈現，正如剛才所講，未必用肉眼睇嘅就係最清楚，可能唔清楚先至係嗰樣嘢嘅本質，反而好明確地刻畫嗰樣嘢嘅輪廓，冇乜質地。今次我哋會玩一啲比較唔係好清楚嘅嘢，多少少流動性，望住隻碟都覺得佢好似郁動緊。」@

-------------------
局勢持續演變
與您見證世界格局重塑
-------------------

🔔下載大紀元App 接收即時新聞通知：
🍎iOS：https://bit.ly/epochhkios
🤖Android：https://bit.ly/epochhkand

📰周末版實體報銷售點👇🏻
http://epochtimeshk.org/stores