拯救流浪貓狗的義工，往往會為牠們找得好歸宿；但是一名義工昨（12日）在fb發文，為一對流浪唐狗尋找主人，竟稱9月30日前無人領養，「我會10月1日親自送佢哋一程」，引來網民紛紛批評。
該義工昨午在fb發文，稱大約4個月大流浪唐狗「兩兄弟已經等咗兩個月」，即使出帖文、參加領養日都無人看中，「暫託姨姨屋企已經有好多狗，唔可以收留佢哋」，並稱「如果9月30號之前無人領養，我會10月1日親自送佢哋一程」。
她續指，「唔好問我點解，問下啲人點解買狗仲好，問下佢哋點解選擇購買而唔領養。你哋每買一隻狗，就等於扼殺咗一隻正等待領養嘅狗嘅機會。」
網民批評救狗後反殺狗 倡絕育原放
其言論引來網民批評「好冷血」、「衰過棄養」，有網民建議如果沒人領養，可為牠們絕育後放回原地。也有人稱「做得義工接得就要預咗，如果冇人領養就自己要，一開始如果冇能力就唔好學人接。」
亦有人批評，指該義工認為原地放回狗狗，萬一牠們生存不到更慘，質疑她急要找領養人，篩選領養人程序多數會「鬆手」，「萬一遇著對狗唔好嘅領養人，咁又做返浪浪慘d（啲），定被唔好嘅領養人對待慘d（啲）？」。另外有人指出，如果無人領養就要了結牠們， 「你不如休息下唔好救， 至少佢地喺山仲有一線生機」。
又有網民留言，稱自己住處有位，「如果你一定要殺佢唔該比（俾）我領養」，亦有人呼籲「請給狗狗一個生存的機會！」，稱「人類不是神，不可以操縱或扼殺任何一條寶貴生命」。
部份網民批評該義工「情緒勒索」，令人反感；但是她反擊並無情緒勒索，「叫你哋支持領養啫，好難咩？」。不過有網民反擊「妳自己拯救動物嘅過程，自我感覺良好。但後續殺狗嘅妳，妳又合理化去賴世人唔領養動物，所以妳去殺狗唔係妳錯。妳呢類人根本就係心理變態！」
6月在大帽山帶走兩隻流浪狗
該義工稱，她是6月駕車途徑大帽山時發現兩隻流浪狗並帶走。翻查該義工的fb，不時貼出貓狗領養相關的帖文，當中在6月19日，她發文指凌晨約2時，在大帽山山頭見到3隻大約兩個半月大的狗BB，「兩隻啡色，一隻啡黑色」，「有托位先至捉」。之後稱當日6時左右在另一義工幫忙下，「已捉起了兩隻啡色的」，「暫時在餵狗姨姨家，但只能托兩三日」。
該義工在6月22日再發文，指兩狗在餵狗姨姨的家安頓好，但對方「只可以留佢哋幾日」，故「急尋暫托」，到6月24日，稱「等咗兩日都無人肯幫手暫托」，於是尋求他人領養。@
--------------------
向每位救援者致敬
願香港人彼此扶持走過黑暗
--------------------
🔔下載大紀元App 接收即時新聞通知：
🍎iOS：https://bit.ly/epochhkios
🤖Android：https://bit.ly/epochhkand
📰周末版實體報銷售點👇🏻
http://epochtimeshk.org/stores
