《飯2》長老謝票團大派開運風車

今日（22日），《飯戲攻心2》的「飯團」長老胡楓（修哥）、羅蘭（羅蘭姐）、黎彼得、「堂細佬」胡子彤以及導演陳詠燊（Sunny）出動到觀塘B+ cinema apm戲院謝票。之後長老謝票團更落區大派開運風車，並宣布長者免費睇《飯戲攻心2》。

修哥一出場就中氣十足地大讚導演陳詠燊：「各位老友記好冇睇啊？這部戲是導演的誠意之作，開拍前經過深思熟慮，而家成績都非常之好，成為黃曆新年期間賣座冠軍之作。」修哥更講到新年期間開心有仔女、孫、曾孫們來拜年，亦有派出大利是，大家都好開心。

飾演堂細佬的胡子彤早前曾提及唔知自己點解係修哥個仔，Sunny即時拆解疑惑：「這個家族相當神奇，子彤的年紀竟然是修哥的兒仔。唔知大家有冇留意到戲中對白，其實修哥係個不羈的浪子，當中有一句對白講道『我早幾年做老襯』，所以修哥在戲中不同年紀都有老婆和女朋友，好厲害，所以有個咁細的仔好合理。」子彤則說：「希望之後再合作，瘋狂叫修哥做老竇，等緊佢封大利是。」

羅蘭姐同樣多謝導演以及各位觀眾的支持，她說：「相信大家都有感受到這部戲的各種情感，會有感動亦會有心酸，全靠導演的一番心思。睇到粉絲話自己多次入場都好開心，自己有段時間成日睇早場，不過早前因疫情影響而減少，而家可以入戲院睇戲好開心。」

黎彼得搞笑講到：「我都好耐冇拍戲，這部戲冇得頂，估唔到續集翻轉來做，在粵港澳湛、全世界都有好口碑。早前東莞朋友打俾我大讚部戲好睇，希望之後開續集，在此送個戲名俾導演，下集可以用《安樂茶飯》，大家都有得食安樂電影公司的茶飯。」

謝票過後，修哥、羅蘭姐、黎彼得、胡子彤以及Sunny一齊「出巡」，到觀塘及新蒲崗「落區」向市民大派開運風車，市民紛紛從「飯團」三大長老手上接個風車，場面非常熱鬧。團隊並宣布由今日起現凡於百老匯院線戲院票房購買《飯戲攻心2》正價戲票1張，同一場次帶同一位60歲或以上長者，該名長者即可獲同一場次《飯戲攻心2》免費戲票一張，團隊希望各位觀眾把握是次優惠，約一家大小一齊入場睇好戲。@