2023年4月16日星期日喺倫敦依士靈頓華人協會舉行咗一個開心粵曲雅聚。

說來話長，下午一時節目才開始，但早上10時已經有長者登門等候入場，仲有兩位坐住輪椅嚟嘅，幸好協會已經安裝左一座升降機上落樓上大禮堂。場地原本係星期日早上都編排了太極班，一不留神場地租用鬧雙胞；幸好耍陳氏太極的劉師傅是老朋友，將太極班搬到樓下小禮堂繼續授課，大家一團和氣，各得其所。

協會樓上大禮堂面積約2000呎樓高40多呎，由於係綜合用途社區會堂，隔音設備差強人意，音響亦都係年年添加大家都唔會點投訴，燈光係一流嘅世界光，樂器室寬敞，冬凍夏熱，會場布置自有專家設計，專用停車場，以硬件來講可以話係盡如人意嘅。有35年歷史嘅華人社區中心，早期喺知己路嘅會址，有來自西貢的會友溫達強夫婦，最初負責一個午餐會，又捐贈左一套鑼鼓獅頭俾中心，同時呢亦有一班粵曲發燒友喺中心三五知己唱吓粵曲，絃樂師傅來來去去三三兩兩，如是者亦有十年八載，一時一地唔同嘅人，一代一代咁延續落去。到咗駱樹榮師傅喺度成立左呢個昇平曲藝社，又有10年八年嘅光景。2010年協會從知己路搬到喫茶路現址，昇平遷到另一個好地方；依士靈頓華人協會曲藝社繼續喺喫茶路絃歌寄意，於茲又有十三四個年頭，咁今日到咗一個盛大嘅終結，希望一個完美嘅句號，又係另一新篇嘅開始。

音樂領導李鼐松，專程從香港而來嘅客席領導彭偉基，擊樂領導李浩華，音樂拍和包括孔慶芳、蘇媚朗、杜月好、莫海量、鄧淑芬，鍾愛葵，莫遠祥。佢哋好多都係半途出家，但係都玩左10多20年甚至30多年，工多藝熟，而今遊走喺倫敦六七個曲藝社之間，繼續佢哋嘅伴奏生涯。每一場動輒七八個鐘頭馬拉松，體力同埋腦力啲要求都唔係少嘅，醉心熱愛曲藝，咁希望後繼有人啦。

今日嘅曲目包括: 千里故人千里月（沈彩英、陳蘇妹），靈台夜訪（劉秀清、阮瑞英），夢斷沈園春（鄧淑芬、鍾愛葵），沈園遺恨（潘耀南、廖玫芬），殺忠妻（謝筠慧、鍾佩英），花蕊夫人之劫後描容（溫炳榮、黎蘭娣），打金枝（徐帶娣、何清蓮），繁華易散煙花冷（何錦雲、潘少蓮），櫻桃落盡春歸去（鄧淑芬、梁群英），忍辱未忘家國恨（瀟湘、劉小嬌），竊符救趙（文忠良、蔡健芬），南唐殘夢（劉月梅、溫佩英）。大家可以見到男性嘅平喉唱口只有三位，其餘都係女士；叫阿英嘅有五位，叫阿芬嘅有四位，叫阿蓮阿娣嘅各有兩位，其她叫阿清、梅、妹、葵、慧、雲、嬌、湘嘅各一；咁大家從名字之中大概都可以了解一下佢哋嘅背景身世，進一步就係一個文化符號學嘅專題研究。

大家從曲目同埋名氏之間，都估到係一班傳統粵曲愛好者，同嶺南文化有好大嘅關連，好多都係從事飲食行業或者係家庭主婦，只求熱愛不問理由，呢一個係咪海外嘅思鄉情結條件反射？而家情況算唔算係禮失而求諸野呢？

協會早期從廣州添置一批樂器，包括四座揚琴同埋二胡，亦都曾經開過少年音樂組、中樂班，好想定位成為一個曲藝文化中心嘅，未能成事。曾經將部份閒置嘅樂器捐贈俾倫敦大學亞非學院嘅音樂系善用；佢哋嘅江南絲竹樂苑呢亦都曾經多次嚟到中心慶賀新年演出。協會多年來亦舉行過唔少場數嘅粵曲欣賞會，誠邀香港和廣州的藝術工作者客座嘉賓演出。

演出一坐就八粒鐘，有啲觀眾只係嚟捧場聽一兩首歌嘅；但係由頭坐到尾嘅都有超過一半人數，而且年紀都唔係細㗎，有啲人靠孫仔孫女或者仔女送到會場，好難得有一日咁嘅雅聚提供文化精神食糧；中場休息又可以享用雞尾飽或菠蘿飽及礦泉水，萬水千山總是情啦。雅聚曲終人散後，樓下嘅小禮堂百人共晉五餸盛筵：梅菜扣肉、冬菇炆鵝掌、甜酸排骨、清蒸鱸魚、小棠菜，酒酣耳熱，盡興而歸，餘音嫋嫋。

話說回來，早期係甘頓區有個賢慶曲藝社文師傅喺度賣樂器同埋開班；稍後麥皓昌師傅係唐人街華人社區中心開咗海韻中樂團，桃李滿華埠；利物浦百祥塔1982年廖桂雄師傅創辦咗一個非常成功嘅青少年中樂團，佢嘅遺孀2013年亦因此得到大英帝國勳章，百祥塔現在更提供翻譯文件認證服務，與領使館關係友善。係英國唔同嘅城鎮或有唔同嘅小小曲藝社，唔同嘅知音人以粵曲民樂自娛。而倫敦嘅曲藝社好多時亦會租用波蘭劇院，史坦娜劇院等等演出，每次吸引幾百名顧曲周郎，雖然大都係免費入場，甚至多派一支礦泉水一個飽，都係好開心嘅。倫敦曾經有過陳大燦教授擔任團長的倫敦中樂團，李惠馨推廣的倫敦京崑研習社；現在還有程玉博士的幽蘭琴社等等。藝術可以不分雅俗，可以精緻，亦可以普羅，可以殿堂演出，當然亦可以喺水井處同埋社區會堂演出。粵曲民樂可以係深入民間，與眾同樂，藝術無國界，藝術色彩繽紛，藝術無古今，只分高下。

呢個開心粵曲雅聚呱呱叫好，首要感謝蔡健芬幾十年來潛心經營，瞻前顧後，任怨任勞，大大小小事不辭勞苦；「我本是女嬌娥」嘅趙珊珊，係一位出色嘅平喉唱口，識者以為有任姐之風，喺香港新來步到擔任司儀大方淡定，調節有道。依士靈頓華人協會篳路藍縷，幾許風雨，際此新人事、新作風，喺完美嘅硬件之下，好好運作，欣賞粵曲粵劇民樂，不敢奢言傳承文化，只求一地一時締結文化姻緣，風雨絃歌不輟，日日繞樑。

阪本龍一寄語：「藝粹千秋，人間一瞬」，有待有心人。◇

------------------

🏵️《九評》20周年👉🏻 https://hk.epochtimes.com/category/專題/退黨大潮

💎成為會員 📧訂閱電子報
https://hk.epochtimes.com/subscribe

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand