香港男團MIRROR近年人氣高企，出道4年即將踏上紅館開騷，消息一經傳出已經開始全城撲飛。昨日（30日）適逢MIRROR成員姜濤23歲生日，姜濤香港後援會就請全港市民免費搭電車一日，齊齊慶祝「姜濤誕」，並在多處設「打卡位」，吸引粉絲逼爆銅鑼灣。而當男女老幼都在熱議Mirror時，遠在英國的才子陶傑近日亦有在節目中談此話題，惟才子有更冷靜更精闢的觀點。對比當年許冠傑，他指Mirror未算紅，日前他更直指Mirror「係虛火嚟，對唔住…MIRROR係救唔到香港音樂工業同影視，因為呢一行係要真材實料，係要深度同內涵」。

對比當年許冠傑  Mirror未有經典歌曲唱到街知巷聞

陶傑在週三（27日）晚上主持的商台節目《光明頂》中，表示對曾江逝世的惋惜，進而提及香港電影圈的年齡歧視問題，之後又談到對人氣組合MIRROR的看法。期間，雖然才子肯定MIRROR的努力，惟將事件放到大的背景當中，則不得不提及眼前的社會環境，故此才子直言：「這些只是虛火，對不起，Mirror是救不到香港音樂工業同影視的，因為這一行要真才實料，要有深度同內涵。」

才子一番評論引起社會熱議，連主持人馮智政都有些緊張，深怕打擊一眾鏡粉。昨日（30日）陶傑再Phone in 《光明頂》，繼續跟主持馮智正探討對MIRROR的看法。

陶傑以多角度分析MIRROR爆紅原因，他認為多多少少與近年的政治環境有關，他並指，MIRROR的歌曲未算大紅，除鏡粉外，未去到街知巷聞的地步，而對比當年的歌神許冠傑，好多經典歌曲則唱到街知巷聞，連豬肉佬都會唱。

陶傑說:「我尋日講來講去你哋(MIRROR)嗰種走紅，對香港電影、電視、音樂工業有冇幫助?我認為幫助不大，點解呢?因為成個形勢、氣氛、唔係七十年代至九十年代中嘅娛樂生態環境，你哋話佢係歌星，歌星要有歌先得，你話俾我聽，MIRROR 唱過邊幾隻歌，全香港，唔係剩係佢粉絲，嗱! 許冠傑當年唱隻《打雀英雄傳》，就算唔係聽過許冠傑情歌嗰啲，喺街邊斬豬肉、小販都覺得好正，呢個就叫做紅喇!」

其實，許冠傑當年朗朗上口的歌曲真是數不勝數，陶傑只例舉一首，其它如：《鐵塔凌雲》、《鬼馬雙星》、《天才與白痴》、《半斤八兩》、《財神到》、《浪子心聲》、《笑傲江湖》等，都膾炙人口。

紅歌星除具備「聲色藝」同時要有經典歌曲流傳

陶傑所講的，也正是上一代知名音樂人黎小田生前在接受《大紀元》專訪時所講的，所謂「經典歌曲」的由來，可能是一部電視劇主題曲，配合當時的劇集情節，加上音樂、歌詞、歌手的演繹，能夠觸動到人心，唱到家傳戶曉，朗朗上口，男女老幼都跟著哼唱，小販、髮廊、街市，處處播放，且經過多少年都歷久不衰，才算得上「經典」，而對於歌手，才算是紅。

這也是陶傑在上一集《光明頂》節目當中所提到了梅艷芳、張國榮，他們不僅具備「聲、色、藝」，同時亦有不少的經典歌曲流傳，經由他們唱到街知巷聞，非佢莫屬，如梅艷芳的《心債》、《壞女孩》、《似水流年》、《胭脂扣》、《夕陽之歌》；如張國榮的：《風繼續吹》、《Monica》、《沉默是金》、《當年情》、《追》、《倩女幽魂》、《無心睡眠》等，首首經典，已經成為他們的icon。

而所謂「內涵」，梅姐一生奉獻舞台，為人豪爽義氣，有「香港的女兒」美譽。張國榮（哥哥）13歲到英國讀書，大學期間副修英國文學，無論哥哥的個人素養、教育、為人，在浩瀚的星海中都是獨一無二、辨識度極高的。或者，這就是才子所講的「深度同內涵」。

風靡Mirror   代表傘後、19後政治情感投射？

在上一集《光明頂》節目當中，陶傑直言：「睇嚟睇去都係MIRROR，MIRROR唔係話唔好，OK？你可以喺情感方面向佢投射。但係12件咁嘅嘢呢，樣樣小鮮肉，搓埋一團麵粉，拉返出嚟，我唔覺得分得開得出邊個打邊個囉。係你有啲人話分得開啫，我唔覺得係。」

這也是陶傑所講「虛火」一詞的由來。他分析指：「你可以有一種咩傘後、19年之後，你自己嗰種一廂情願嘅政治情感投射，但係MIRROR係救唔到香港嘅音樂工業同影視，對唔住，因為呢一行係要真材實料...係要深度同內涵。」換言之，才子認為「小鮮肉」仍欠缺深度和內涵。

或者杜Sir杜琪峯亦同才子英雄所見略同？日前杜Sir在電盈新公司 #Makerville 成立記者會上，與谷德昭等暢談創作時，谷德昭提到MIRROR，杜Sir即刻說：「又嚟？好似多咗啲，成日都提佢哋，多唔多得滯呀？」又笑言：「通街都係。我都避唔到，閃嗰度又見，閃嗰度又見，都幾討厭。」

起碼有一件事相同，杜Sir與陶傑都不看韓劇，才子認為韓劇庸俗，「由廿幾年前嗰啲《冬日戀曲》開始我都睇唔落眼，為做戲而做戲，cheap，我忍受唔到嗰啲少少嘢就面容扭曲大嗌，嗰啲我麻麻地。你好學唔學學韓劇，就死路一條。」但對於Netflix劇集，才子則如數家珍。

「小鮮肉」文化下  老戲骨無市場？

悼念曾江，才子又談到韓劇的「年齡歧視」問題嚴重，小鮮肉方程式：角色設定、年齡、身高、妝容均有特定要求，才令陶傑有此番感喟：「睇嚟睇去都係MIRROR…」而當香港也風靡Mirror時，或者他擔心香港也在推崇韓國的「小鮮肉」文化？步其後塵？

《光明頂》另一主持馮智政形容韓劇方程式現象令「老人家冇位置」，陶傑認為，按照西方的左膠路線，電影開戲膚色行先，不理演技好不好，西方大機構請人也以政治正確行先，現在香港同華語世界亦如此。

「最緊要個樣後生、靚仔，有觀眾緣，健身，有肌肉，咁就全部擸晒工作嗰啲機會，30幾歲再上40幾歲50，跟住就話『劉華好老好殘』喎。」陶傑表示，在香港從政與從影剛好相反，前者歧視年輕人，後者歧視年紀成熟的人和老人，各走極端：「一個社會咁樣，我問你有乜嘢前途。」

陶傑接受《娛壹》電話訪問時表示，他想帶出的是香港彌漫一種恐懼氣氛，影響影視工業氣氛，即使MIRROR再紅亦沒有用。「我冇否定MIRROR嘅努力，但問題係MIRROR走紅係咪可以持續呢？係咪可以救到香港影視工業呢？鬼唔知紅好過冇，幕後人有job咩？鬼唔知紅咗，紅館茶水阿嬸都有工開咩？但影視工業成個生態，一定係成行成市，唔係靠一家撐起，一隊走紅係唔夠。」

對於才子有關MIRROR的言論引發網民熱議，有網民質疑「點解要MIRROR救香港樂壇？」陶傑笑言：「唔緊要，我唔係代表真理，只想大家思考下一步點行，呢個深層次問題。如果鏡粉以為我侮辱你偶像，你咁諗低唔低B啲呀？」才子借用好友曾江關於真假話的言論，指「曾江只係識講真話，唔識講假話﹐因為講假話係要諗。」    

或者，才子想帶出的話題是，Mirror紅極一時，之後，能否繼續紅下去？他說：「唔係冇空間，而係開完演唱會之後，要諗條路點樣行。」@

------------------
請訂閱新官方YouTube頻道：
https://bit.ly/2XxPrsd

✅立即支持訂閱：
https://hk.epochtimes.com/subscribe
✅直接贊助大紀元：
https://www.epochtimeshk.org/sponsors
✅成為我們的Patron：
https://www.patreon.com/epochtimeshk

------------------

🏵️《九評》20周年
https://hk.epochtimes.com/category/專題/退黨大潮

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand